Мамматрезервдер фондунда ундун, өсүмдүк майынын кору жетиштүү - бирок кымбатташы мүмкүн

Өзгөчө кырдаалдар министрлигине караштуу Мамлекеттик материалдык резервдер фондунда буудайдын, ундун, өсүмдүк майынын жана кумшекердин кору жетиштүү.  Бул тууралуу министрлер кабинетинин төрагасынын орун басары Бакыт Төрөбаев билдирди.

“Азык-түлүк коопсуздугу дагы мамлекеттик коопсуздуктун негизине кирет. Муну эске алуу менен азык-түлүккө болгон кошумча нарк салыгын төлөөдөн бошотуу маселеси каралууда”, – деди Төрөбаев.  

Эскерте кетсек, кечээ, 26-декабрда Ун өндүрүүчүлөр ассоциациясынын башчысы Руслан Жунушов 2023-жылдан баштап буудайдын баасы 12%, ун 14-15%га кымбатташы мүмкүн экенин билдирген болчу. Ал буга минкабдын күнүмдүк керектелүүчү азык-түлүктөрдүн баасын аныктаган токтомунун мөөнөтүнүн аяктап жатканы себеп болуп жатканын, мындан улам эми импорттолгон азык-түлүктөрдөн 12% киреше салыгы алына баштай турганын айткан.

Ал эми минкабдын маалымат кызматы Төрөбаев жыйында эгерде ун чыгаруучу комбинаттарында буудайдын кору түгөнө турган болсо, Мамматрезервдер фондунун кампаларында буудайдын запасы жетиштүү экенин кошумчалаганын билдирди.

Бирок алардын баасы көтөрүлөбү же конкреттүү чаралар каралса, баа ошондой калабы так маалымат бергенин кабарлаган жок.

Ал эми өсүмдүк майы боюнча минкаб матрезервде майдын кору жетиштүү экенин, бул боюнча май чыгаруучу заводдор менен дагы сүйлөшүүлөр жүргүзүлгөнүн жана аларда күн караманын кору жетиштүү экени айтат.

Бирок жакында эле маалымат жыйынын өткөргөн Айыл чарба министри Аскарбек Жаныбеков республика өсүмдүк майы менен өзүн өзү 20% гана камсыз кыларын, көрсөткүчтөрдү артка тартып турган дал ушул өсүмдүк майы экенин билдирген болчу.

Мындан тышкары, бийлик кумшекер боюнча орчундуу маселе жаралбай тургандыгына ишендирүүдө. Быйылкы жылга карата “Кошой” жана “Кайыңды кант” заводдору менен биргеликте 62 миң тонна кумшекер өндүрүлгөн.