2022-жылды 434.8 млрд сом менен жабабыз - Акылбек Жапаров
Президент Садыр Жапаровдун төрагалыгы алдында бүгүн, 28-декабрда, өлкөнүн министрлер кабинетинин жыйынтыктоочу жыйыны ушул сааттарда өтүүдө.
Жыйында баяндама жасаган минкабдын төрагасы Акылбек Жапаров 2022-жылы консолидацияланган бюджеттин ресурстарын 404.2 млрд сомдон ашыруу планы коюлганын билдирди.
“Жылды болжол менен 434.8 млрд сом менен жабабыз. Эки жылда бюджетти эки эсеге көтөрө алдык. Садыр Жапаров бийликке келгенде консолидацияланган бюджеттин көлөмү 247 млрд сом болсо, 2023-жылы 503 млрд сомго жетебиз деп жатабыз”, – деди минкабдын жетекчиси.
Ошондой эле ал акыркы 10 жылда салыктык түшүүлөрдүн эң көбү 70 млрд сом болсо, 2022-жылдын аягына чейин 155 млрд сом чогултуларын кошумчалады жана эки жылда тоо-кен тармагынан 70.9 млрд сом түшкөнүн белгиледи.
Белгилей кетсек, иш-чарада министрлер кабинетинин 2022-жылы аткарылган иштери боюнча отчету угулуп, 2023-жылга карата иш планы каралууда.
