Мамлекеттик жана тышкы карызды тейлөөгө 39.5 млрд сом жумшалды
Тышкы карызды тейлөө боюнча, кечиктирүү болгон жок. Бул тууралуу минкабдын төрагасы Акылбек Жапаров бүгүн, 28-декабрда өлкөнүн министрлер кабинетинин жыйынтыктоочу жыйынында билдирди.
“Мамлекеттик карызга 39.5 млрд сом, анын ичинен тышкы карызга 26.7 млрд сом берилди. Ушуну менен тышкы карызды тейлөө графиги ийгиликтүү аяктады. Акыркы төлөмдөрдү 23-декабрда жүргүздүк”, – деди ал.
2022-жылдын 30-сентябрына карата КРнын мамлекеттик карызынын көлөмү (тышкы + ички) 5 млрд 218 млн долларды (418 млрд 384 млн сом) түзгөн.
Финансы министрлиги берген маалыматка таянсак, карыздар төмөндөгүдөй:
- 79.8% мамлекеттик тышкы карыз — 4 млрд 162 млн доллар (333 млрд 769 млн сом)
- 20.2% мамлекеттик ички карыз — 1 млрд 28 млн доллар (84 млрд 615 млн сом).
Улутсаткомдун берген маалыматын карасак, Кыргызстандын тышкы карызы беш жыл катары менен көбөйүүдө. 2021-жылдын жыйынтыгы боюнча анын көлөмү 5 млрд 150 млн долларды (436 млрд 587 млн сом) түзгөн.
