Айрым айыл чарба продукциялары үчүн КНСтин нөлдүк ставкасы узартылды
Министрлер кабинетинин өткөн жылдын аягындагы токтомуна ылайык, өсүмдүк майын, тоок жумурткасын, дан эгиндерин, тоют азыктарын, арпа, ун жана ушул сыяктуу айыл чарба азыктарын импорттоодо КНСтин нөлдүк ставкасы узартылды. Бул тууралуу Экономика министрлиги билдирди.
Белгилей кетсек, өлкөнүн азык-түлүк коопсуздугун камсыз кылуу, айыл чарба продукциясынын кескин тартыштыгын болтурбоо максатында, 2022-жылдын аягында “КРда азык-түлүк коопсуздугун камсыз кылуу жана ата мекендик айыл чарба өндүрүүчүлөрүн жана дыйкан (фермер) чарбаларын колдоо боюнча чаралар жөнүндө” токтомуна өзгөртүүлөрдү киргизүү тууралуу токтому кабыл алынган.
Аталган токтомго ылайык, 2023-жылдын 1-январынан 31-декабрына чейин КР аймагына ташылып келинген жана импорттолуучу товарлар үчүн КНСтин нөл пайыздык ставкасы белгиленди.
Бул чечим жеткирүүчүлөргө, импорттоочуларга тизмеде көрсөтүлгөн товарларды салыктын нөлдүк ставкасы менен КРнын аймагына ташып келүүгө мүмкүндүк берет, бул өз кезегинде кыскартуу багытында керектөөчү үчүн акыркы баага олуттуу таасирин тийгизет. Тизмеге кайсы азыктар кирет бул жерден көрүүгө болот.
КР өкмөтүнүн 2009-жылдын 3-мартындагы токтому менен бекитилген КРнын азык-түлүк коопсуздугунун мониторинги жана көрсөткүчтөрү жөнүндө жобого ылайык, азык-түлүк коопсуздугунун деңгээлин баалоо үчүн негизги продукциялар бул таблицада аныкталган.
