Россия Кыргызстандын бардык складдарын параллелдүү импорт менен толтуруп салды – бош жер калган жок
Быйылкы жазга карата кошуна өлкөлөр аркылуу Россияга параллелдүү импорттун көлөмүнүн өсүшү ЕАЭБдеги мамлекеттердин, дагы кээ бир өлкөлөрдүн дээрлик бардык складдарынын толушуна алып келди. Кыргызстанда, Казакстанда, Тажикстанда, Арменияда жана Грузияда склад катары колдонулган бош кыймылсыз мүлк калбай калган. Бул тууралуу россиялык «Коммерсант» басылмасы жазып чыккан.
Басылма NF Group консалтингдик компаниясынын (мурдагы Knight Frank Russia) маалыматтарына таянат. Ага ылайык, россиялык компаниялар тарабынан коңшу өлкөлөрдө складдарга болгон суроо-талаптарынын саны жаздын башына карата 40-50%га, б.а. дээрлик 400 миң м²ге чейин өскөн. Кыргызстанды алсак, бул жагдай өлкөдөгү бардык складдардын — 46 миң м² аянттын ээленишине алып келген.
NF Group өнөктөшү Константин Фомиченконун айтымында, Арменияда, Грузияда, Казакстанда, Кыргызстанда жана Тажикстанда бош жайлар дээрлик жок, Беларустагы логопарктарына кирген аянты 1.6 млн м² даяр объектилердин 2.8%дан ашпаган бөлүгү гана бош. Өзбекстанда — 207 миң м² дин 4.5%ы гана бош.
Сактоочу жай инфраструктурасынын жетишсиздиги Россияга параллелдүү импорттун андан ары өсүшүн кыйындатат, деп билдирген басылмага логистикалык операторлордун бири.
Россия менен чектеш өлкөлөрдө складдарга болгон негизги суроо-талапты ири чекене сатуучулар, анын ичинде электрондук коммерция жана логистикалык операторлор пайда кылат, деп белгилейт NF Group.
Муну акыркы убакта ири онлайн соода аянтчаларынын аймактык рынокко чыгуулары далилдейт. Ошентип, быйылкы жылдын январь айында «Интернет решения» компаниясы (Ozon бренди менен иш алып барат) Бишкекте сорттоо борборун ачты. Ал эми Wildberries компаниясы Алматыга жакын жерде логистикалык борбордун курулушуна 100 млн доллар жумшай турганын билдирген.
Эксперттер жана логистикалык тармактын өкүлдөрү «Коммерсант» басылмасына комментарий берип жатып, алар Борбор Азияда складдарды курууга россиялык компаниялардын каражаттары салынышы мүмкүн экенин айтышты. Бир гана маселе, аймактын өлкөлөрү складдарга болгон мынчалык шашылыш суроо-талапка да, бул секторго тез арада түшүшү мүмкүн инвестицияларга да даяр эмес. Борбордук Азияда логистикалык борборлорду куруу үчүн даяр жерлер аз экени белгилүү болгон.
