Сот аткаруучулары казынага 9 айда 510 млн сом кайтарышты
2025-жылдын 9 айында Башкы прокуратуранын Сот аткаруучулар кызматы мамлекеттик казынага 510 млн 889 миң сом жана 165 миллиондон ашык сомго бааланган мүлктү кайтарууга жетишкенин аталган мекеменин маалымат кызматы билдирди.
Аталган кызматтын билдиришинче, 2024-жылдын 9 айында 464 млн 570 миң сом мамлекетке кайтарылган. Быйылкы жылдын сентябрь айынын жыйынтыгы боюнча республика боюнча 145 миң 144 аткаруучу документтер иштер аткарылып, анын ичинен 132 миң 815и мамлекеттин, калганы жарандар менен юридикалык жактардын пайдасына чечилген.
Жыл башынан бери 1 миң 160 документ боюнча алимент чогултулуп, алимент төлөөдөн качкан1 миң 322 адамга издөө жарыяланган. Сот аткаруучулар алимент төлөөдөн качкан адамдарга карата 17 миң 340 убактылуу чектөөлөр жана аларды алуу жөнүндө токтомду Миграциялык каттоого алуу бирдиктүү системасына киргизген жана чыгарган.
Республика боюнча 238 мамлекет пайдасына конфискациялануучу мүлк боюнча аткаруу өндүрүшү көзөмөлгө алынган. Анын ичинен Ош, Жалал-Абад жана Баткен облустарында 153 өндрүш иши толук аткарылган.
Мамлекетке кайтарылган мүлктүн жалпы суммасы 165 млн 403 миң 953 сомду түзгөн.
