Акылбек Жапаров Бишкектеги кароосуз калган заводдорду талкаланган Бахмут менен салыштырды
Президент Садыр Жапаров жана министрлер кабинетинин төрагасы Акылбек Жапаров «Бишкек машина куруучу заводу» (БМЗ) Ачык акционердик коомуна жана «Бишкек штамптоочу заводу» (БШЗ) ишканаларына барып ишмердүүлүгү менен таанышты.
Мамлекет башчысы заводдордун өндүрүш аймактарын, токтоп турган цехтерди жана ишканалардын объектилерин көрүп чыкты.
Акылбек Жапаров ишканаларды текшерүүнүн алкагында объектилердин абалы кейиштүү экенин айтып, Бахмут шаары менен салыштырды(Украинанын Донецк облусундагы согушуудан талкаланган шаар – ред. эскертүү,) билдирди.
Андан ары Акылбек Жапаров президентке аталган объектилердин кубаттуулуктарын жакшыртуу жана жогорулатуу боюнча жүргүзүлүп жаткан жана пландаштырылган иштер тууралуу маалымат берди. Тактап айтканда, бул жерде жаңы өндүрүш аянттарын, технопарк сыяктуу ири объектилерди ачуу үчүн чет элдик инвестицияны тартуу керектигин айтты.
Мындан тышкары, президент Садыр Жапаров министрлер кабинетине инвестиция тартууну, токтоп турган ишканаларды кайра ишке киргизүү үчүн жагымдуу инвестициялык климатты түзүүнү тапшырды.
