Жездин баасы кымбаттайт
Goldman Sachs банкы 2026-жылга карата жездин тоннасынын баасы 10 миң доллардан 10,5 миң долларга чейин көтөрүлөрүн божомолдоодо. Бул тууралуу Интерфакс агенттиги жазды.
Эксперттердин айтымында, баанын көтөрүлүшүнө төмөнкү факторлор себеп болууда:
- Индонезиядагы Grasberg кениндеги жеткирүүлөрдүн үзгүлтүккө учурашы;
- АКШ долларынын алсырашы;
- Пайыздык чендердин төмөндөшү.
“Жездин баасы $10–11 миң доллардын тегерегинде. Чийки затка болгон тартыштык жана экономиканын негизги тармактарындагы суроо-талаптын өсүшү жаңы баа деңгээлин калыптандырып жатат”, — деп айтылат Goldman Sachsтын билдирүүсүндө.
Бирок, Лондон металл биржасында (LME) жездин фьючерстеринин баасы дүйшөмбүдө 0,8%га төмөндөп, тоннасына $10,67 миңге түшкөн.
Эске сала кетсек, сентябрдын аягында Индонезиядагы Grasberg кениндеги адам өмүрүн алган кырсыктан улам Freeport-McMoRan форс-мажор жарыялаган. Бул окуя дүйнөлүк жез өндүрүшүнө таасир этип, 2025-жылкы өсүш 0,8% эмес, 0,2% гана болот деп күтүлүүдө. Мунун натыйжасында 55,5 миң тонналык дефицит жаралышы мүмкүн. Бирок, 2026-жылы рынок тең салмакка келери айтылууда.
