Кытай Коммерция министрлиги АКШга чечкиндүү жооп кыларын эскертти
Эгер АКШ президенти Дональд Трамп Кытай товарларына 100 пайыз бажы салыгын киргизе турган болсо Пекин ага чечкиндүү жооп кыларын кытай Коммерция министрлиги билдирди.
“Америка тараптын мындай билдирүүсү кош стандарттын классикалык үлгүсү болуп жатат. Кез келген эле ыңгайлуу учурда жогорку бажы салыгын киргизүү менен коркута берүү КЭР менен болгон өз ара мамиленин жакшы жагы эмес. Эгер АКШ мындан ары да ушул жол менен кете берсе биздин өлкө тиешелүү аракеттерди көрөт, өзүнүн мыйзамдуу укуктарын жана кызыкчылыктарын коргойт” ,-делет Пекиндин маалыматында.
Буга улай текстте “КЭР жоопкерчиликтүү ири держава катары дайыма өзүнүн улуттук жана жалпы эл аралык коопсуздугун чечкиндүү коргоп, ошондой эле экспорттук көзөмөл чараларын кылдаттык, акылга сыярлык менен колдонуп, калыстык, акылгөйлүк жана кемсинтүүгө жол бербөө принцибин карманып келет”,-деп жазылат.
Эске салсак, буга чейин АКШ лидери Кытай товарларына бажы салыгын жогорулатуу каралып жатканын Truth Social соцбаракчасына жазган.
