Соцфонд: Мамлекеттик топтомо пенсиялык фонддун кирешеси 5 млрд сомго жетти
Социалдык фонд Мамлекеттик топтомо пенсиялык фондунун 2025-жылдын январь-сентябрь айларындагы инвестицияларынын жыйынтыгын жарыялады.
Маалыматка ылайык, 2025-жылдын январь-сентябрь айларында Мамлекеттик топтомо пенсиялык фондунун (МТПФ) каражаттары 15,2 млрд сомдон ашык суммада инвестицияланган. Анын ичинен 9,4 млрд сом мамлекеттик баалуу кагаздарга 12,9-16,0% жылдык кирешелүүлүк менен салынган.
Коммерциялык банктардын 12 жана 18 айлык депозиттерине 4,1 млрд сом жайгаштырылып, жылдык киреше 12,1-13,5% түздү. Ошондой эле 1,75 млрд сом КР эмитенттеринин акцияларына инвестицияланган.
Отчеттук мөөнөттө инвестицияланган каражаттардан жалпы 5 млрд сомдон ашык киреше түшкөн. Анын ичинде мамлекеттик баалуу кагаздардан 4,3 млрд сом, депозиттерден 668 млн сом жана башка кирешелерден 23 млн сомдон ашык сумма алынган.
Бул көрсөткүчтөр МТПФнын каражаттарын эффективдүү башкаруу жана пенсиялык камсыздоонун туруктуулугун камсыздоодо маанилүү роль ойногонун далилдейт.
