Бир жумада QR-код аркылуу 40 млн сом бажы төлөмү чогулду
Мамлекеттик бажы кызматынын төрагасы Алмаз Салиевдин айтымында, бажы төлөмдөрүн QR-код аркылуу төлөө системасы ишке киргизилгенден бери бир жуманын ичинде бюджетке 40 млн сомго жакын каражат түшкөн.
Жаңы кызмат “Элдик банк” менен биргеликте ишке ашырылып, ишкерлерге бажы төлөмдөрүн каалаган жерде жана каалаган учурда онлайн төлөөгө шарт түздү.
“Ишкерлер Бажы кызматынын сайтынан уникалдуу кодду киргизип, QR-код аркылуу төлөм жүргүзө алышат. Төлөм жасалгандан кийин маалымат дароо системага түшөт. Бул ишкерлер үчүн абдан ыңгайлуу шарт”, — деди Салиев “Биринчи радионун” түз эфиринде.
Ошондой эле QR-код системасы жарандар менен кайтарым байланыш механизмин өркүндөтүү жана мамлекеттик кызматтарды ачык-айкын кылуу максатын көздөйт.
