10 айда курулуш тармагындагы инвестиция 18,9%га көбөйгөн
2025-жылдын 10 айында негизги капиталга инвестициялардын көлөмү 246,7 млрд сомго жетип, өткөн жылга салыштырмалуу 18,9%га өстү. Өсүштүн негизги булагы — ички инвестициялардын 21,8 %га, тышкы булактардын 5,2 %га көбөйүшү болду. Бул тууралуу Экономика жана коммерция министрлигинин маалымат кызматынан билдиришти.
Инвестициялардын 83%ы пайдалуу кендерди казууга, энергетикага, иштетүү өнөр жайына, транспорт жана жүк сактоо тармагына, билим берүү объектилерине жана турак жай курулушуна багытталды.
Тармактагы өсүшкө төмөнкү факторлор таасир этти:
- “Менин үйүм” программасынын алкагында 3 621 батирдин курулушу аяктады;
- MegaCom жана O! операторлорунун байланыш инфраструктурасын кеңейтүүсү;
- билим берүү объектилерине инвестициялардын 10,5 %га өсүшү;
- Бишкек шаарында инфраструктуралык долбоорлорго капиталдык салымдардын көбөйүшү;
- спорт жана туристтик объектилердин курулушуна инвестициялардын артышы.
Жыйынтыгында, курулуштун дүң продукциясы 269,1 млрд сомду түзүп, 27,7 %га өстү. Тармак ИДПнын өсүшүнө 1,95 пайыздык пункт салым кошуп, экономика түзүмүндөгү үлүшү 8,3 % болду.
