Салык кызматынын түзүлгөндүгүнө 35 жыл болду
Салык кызматы көз карандысыз ведомство катары 1990-жылы Кыргыз Республикасынын Өкмөтүнүн токтому менен түзүлгөн. Ага чейин анын милдетин азыр бюджетти пландаштыруу жана аткаруу үчүн жооптуу болуп жүргөн каржы органдары аткарып келишкен.
1994-жылы агенттик КРнын Финансы министрлигинин алдындагы Мамлекеттик салык инспекциясына айланып, 2010-жылы КРнын Өкмөтүнүн алдындагы Мамлекеттик салык кызматы деп өзгөртүлгөн.
Учурда КРнын Мамлекеттик салык кызматынын системасы Борбордук аппараттан жана республика боюнча 60 аймактык салык кеңселеринен турат.
Бүгүн бул маанилүү дата менен кесиптештерин Салык кызматынын төрагасы Алмамбет Шыкмаматов куттуктап, 35 жыл аралыгында көп нерсе өзгөргөнү менен коом алдында салык кызматынын жоопкерчилиги өзгөрүүсүз калгандыгын билдирди. Анын айтымында, салык — бул жөн гана сан эмес. Салык бул - медицина, билим берүү, жолдор жана социалдык объектилер, айлык маяна, пенсия жана жөлөкпулдар.
“Салык — бул өлкөнүн күчү, мамлекеттин өзөгү. 35 жыл ичинде биз кагаз жүзүндөгү отчёттон санариптик кызматка, формалдуу мамиледен — бизнес менен өнөктөштүккө, ишенимге өттүк. Биз учурдагы жетишкендиктер менен сыймыктанабыз. Бирок, алдыда мындан да чоң, бийик максаттар турат. Санариптештирүү, коомчулуктун ишенимин арттыруу, бизнес менен өнөктөштүктү чыңдоо, жазалоочу органдан кызмат көрсөтүүчү органга айлануу - биздин негизги багыттарыбыз” деп билдирди Шыкмаматов.
