Бишкекте БАРЭК бизнес-форуму башталды
Бишкек шаарында Борбор Азия регионалдык экономикалык кызматташтык программасынын (БАРЭК) эки күндүк бизнес-форуму өз ишин баштады. Бул тууралуу Экономика жана коммерция министрлигинин маалымат кызматынан билдиришти.
Форумдун катышуучуларын тосуп жатып, Экономика жана коммерция министри Бакыт Сыдыков бул бизнес-форум дээрлик 15 жылдан кийинки биринчи ирет өткөрүлүп жатканын белгиледи.
Министрдин айтымында, иш-чара Кыргыз Республикасы БАРЭК Программасында төрагалык кылып жаткан жылда жана 20-ноябрга белгиленген Программанын 24-министрлик конференциясынын алдында өтүп жатат.
"БАРЭКке мүчө өлкөлөр инфраструктуралык, технологиялык, экологиялык, логистикалык сыяктуу бир катар жаңы чакырыктарга да, инвестицияларды тартууга, интеграцияны өркүндөтүүгө жана чөлкөм аралык сооданы өнүктүрүүгө байланышкан жаңы мүмкүнчүлүктөргө да туш болууда. Дал ушул себептен БАРЭК Бизнес-форуму өтө маанилүү — ал B2B жана B2G форматтары үчүн жаңы мүмкүнчүлүктөрдү түзөт", — деп баса белгиледи Б. Сыдыков.
Форумга БАРЭК өлкөлөрүнүн жеке секторунун лидерлери, өкмөт өкүлдөрү, эл аралык каржы институттары жана инновациялык компаниялары катышып, логистика, санариптик соода, финтех, агротехнологиялар, жашыл энергетика жана туруктуу туризм сыяктуу тармактарды сунуштоодо.
