Таштандыны кайра иштетүүчү завод 1-декабрда электр энергиясын бере баштайт
Бишкек мэри Айбек Жунушалиев кечээ “Спутник” маалымат агентигинин жыйындар залында журналисттердин суроолоруна жооп берип жатып, жаңы башкы план долбоорунда шаардыктарды электр энергиясы менен толук камсыз кылуу жагы да эске алынганын билдирди.
“Электр энергиясын үнөмдөө, аны баарына жеткиликтүү кылуу Бишкек шаарынын эле эмес, бүтүндөй өлкө маселеси. Энергетика министрлигинде азыр Бишкек шаарына, жалпы Кыргызстанга жете тургандай электр энергиясын иштеп чыгууну камсыздоо боюнча бир топ иштер жүргүзүлүп жатат. Бишкек шаарына караштуу ЖЭБге 1-декабрда жаңы курулуп бүткөн таштандыны кайра иштетүүчү заводу электр энергиясын берип баштайт. Ошондо шаардыктар электр энергиясы менен камсыз болот. Бирок эл электр энергиясын көп колдонгон мезгилдерде кошумча кубаттуулук керек болот. Шаардын башкы планында элди электр энергиясы менен камсыз кылуу эле эмес, бардык инженердик коммуникациялар эске алынып, жолго коюлган”,-дейт шаар башчысы.
