Парламентте "уйкудагы 15 биржаны" ойготуучу мыйзам долбоору жактырылды

Жогорку Кеңештин бюджет, экономикалык жана фискалдык саясат боюнча комитети "Товардык биржалар жөнүндө" мыйзам долбоорун биринчи окууда жактырды. Бул документ 1992-жылдан бери колдонулуп келген эски мыйзамды толугу менен алмаштырууну көздөйт.

Жаңы мыйзам долбоору соода аянтчаларынын иштөө тартибин, соодага катышуучуларга коюлган талаптарды жана мамлекеттик көзөмөл системасын так аныктайт. Долбоорго ылайык, товардык биржалар эми жалаң гана акционердик коом түрүндө түзүлүп, универсалдуу мүнөзгө ээ болот — башкача айтканда, ар кандай товарларды соодага чыгара алышат.

Мында уставдык капиталга жана каржылык туруктуулукка коюлган талаптарды Министрлер кабинети аныктайт.

Талкуу учурунда белгилүү болгондой, учурда Кыргызстанда 15 товардык биржа расмий катталган. Бирок алардын ишмердүүлүгү дээрлик байкалбайт, ал эми салык төлөмдөрү нөлгө жакын.

Кыргыз фондулук биржасынын башкы директорунун орун басары Мыктыбек Абиров азыр бул биржалар негизинен кагаз жүзүндө гана бар экенин түшүндүрдү. Себеби азыркы мыйзамда так механизмдер жана биржа аркылуу сөзсүз өтүшү керек болгон товарлардын тизмеси көрсөтүлгөн эмес.

Реформанын демилгечилери жаңы нормалар кабыл алынса, бул тармак жанданып, көмүскөдөн чыгат деп эсептешет.

Депутаттар өзгөчө товардык биржалар үчүн сунушталган 25 млн сомдук уставдык капитал маселесине көңүл бурушту. Алар мындай жогорку талап рыноктун өнүгүшүнө тоскоол болушу мүмкүн деген кооптонуусун билдиришти.

Бирок мыйзамды иштеп чыккандар катуу каржылык талаптар зарыл экенин белгилешти. Алардын айтымында, бул соода коопсуздугун камсыздайт: ири капиталы бар биржа келишимдердин аткарылышына жооп берип, жеткирүүлөрдү көзөмөлдөй алат.