9 айда финансы секторунун кирешелери 168,2 млрд сомго жеткен
Улуттук статистика комитетинен билдиришкендей, 2025-жылдын январь-сентябрында экономиканын финансы секторунда 555 уюм иштеп, анын ичинде Улуттук банк, 21 коммерциялык банк, 515 банктык эмес финансылык-кредиттик уюм жана 18 камсыздандыруу компания иш жүргүзгөн.
Маалыматка ылайык, бул убакытта финансы секторунун кардарлар базасы 40%га өсүп, дээрлик 22 миллион адамга жетти. Кардардын көбөйүшү мобилдик банкинг, онлайн кредит берүү системалары жана камсыздандыруу келишимдеринин өсүшү менен байланыштуу.
2025-жылдын 9 айында сектордун суммардык кирешелери 168,2 млрд сомду түзүп, өткөн жылга салыштырмалуу 46%га көбөйдү. Ал эми пайда 64 млрд сомдон ашып, дээрлик эки эсе өскөн. Ишканалардын 61%ы пайда тапкан, 15%ы чыгашага учураган.
1-октябрга карата коммерциялык банктар жана банктык эмес финансылык-кредиттик уюмдардын ачык кредиттик портфели 524 млрд сомду түзүп, анын 88%ы банктарга туура келген. Кредит берүүнүн негизги багыттары: жарандардын керектөө муктаждыктары (37%), соода (22,5%), айыл чарба (11,5%) жана ипотека (10,3%).
