Бүгүн Бишкекте ЖККУнун коопсуздук кеңешинин жыйыны өтөт
Бүгүн "Ынтымак Ордо" имаратында Жамааттык коопсуздук келишим уюмунун (ЖККУ) Жамааттык коопсуздук кеңешинин кезектеги жыйыны өтөт.
Жыйынга президент Садыр Жапаров төрагалык кылып, уюмга мүчө мамлекеттердин башчылары – Беларусь президенти Александр Лукашенко, Казакстан президенти Касым-Жомарт Токаев, Россия президенти Владимир Путин жана Тажикстан президенти Эмомали Рахмон катышат.
Жыйындын жыйынтыгы боюнча жамааттык коргонуу механизмдерин мындан аркы чыңдоого, мүчө-мамлекеттердин коопсуздук маселелериндеги өз ара аракеттенүүлөрүн өркүндөтүүгө жана аскердик-саясий чөйрөдөгү кызматташтыкты кеңейтүүгө багытталган ондон ашык чечимдерге кол коюу пландалып жатканы маалымдалган.
Эске салсак, 2026-жылы ЖККУдагы төрагалык Кыргызстандан Россияга өтөт. Кечээ, 26-ноябрда ЖККУга мүчө-мамлекеттердин башчылары Кыргызстанга келишкен. Мамлекет башчылары саммиттин алдында "Ала-Арча" мамлекеттик резиденциясында этномаданий программа менен таанышышты.
