“Google салыгынан” өлкө бюджетине 1,3 миллиард сомдон ашык киреше түшкөн
"Google салыгы" кыргыз бюджетине январь-октябрь айларында 1,3 миллиард сомдон ашык киреше алып келгенин Финансы министрлиги билдирди. Бул өткөн жылдын ушул мезгилине салыштырмалуу дээрлик эки эсеге көп. Былтыр 9 айда 678,8 миллион сом чогултулган.
Эске салсак, Кыргызстан колдонуучуларына электрондук кызмат көрсөткөн чет элдик уюмдар үчүн 2022-жылы “Google салыгы” киргизилген. Кошумча нарк салыгынын ставкасы сатылган кызматтардын наркынын 12 пайызын түзөт.
2023-жылы Кыргызстанда электрондук кызмат көрсөткөн 48 чет элдик компания, анын ичинде Google, Facebook, Yandex Go, стриминг кызматтары жана программалык камсыздоону иштеп чыгуучулар салык төлөшкөн.
Салык кызматынын маалыматы боюнча, Нидерландияда расмий катталган төрт компания мурда аралыктан салык каттоосун жүргүзгөн. Ошондой эле АКШда, Улуу Британияда жана Россияда экиден компания, ал эми Ирландияда, Бириккен Араб Эмираттарында, Арменияда, Казакстанда жана Кипрде бирден компания катталган.
