Зергерчилик тармагын өнүктүрүү үчүн жаңы Жарлык чыкты
Президенти Садыр Жапаров зергерчилик өнөр жайын комплекстүү өнүктүрүү жана ата мекендик ювелирдик өндүрүүчүлөргө колдоо көрсөтүү максатында "Экономиканын айрым тармактарын колдоо боюнча чаралар жөнүндө" Жарлыкка кол койду. Бул тууралуу Салык кызматынан билдиришти.
Жарлык алкагында зергерчилик тармагын колдоого багытталган негизги чаралар камтылган:
- Импорт жана экспорт боюнча жеңилдиктер: жабдуулар, технологиялар, реактивдер жана жарым фабрикаттарды импорттоодо, ошондой эле ювелирдик буюмдарды чет өлкөлүк көргөзмөлөргө чыгууда бажы жана салык жеңилдиктери каралган.
- Зер буюмдарын легалдаштыруу: эки айдын ичинде мурда ташылып келинген же өндүрүлгөн баалуу металлдардан жасалган буюмдарды текшерүүгө мораторий киргизилет.
- Өз эн тамгасын колдонуу: ата мекендик өндүрүүчүлөр ювелирдик буюмдарын өзүнүн үлгүсүн ырастоочу эн тамгасы менен белгилей алышат.
- Чийки затты алуу: Мамлекеттик фонддун баалуу металлдарына жана таштарына жеткиликтүүлүк жеңилдетилип, чийки затты төлөө мөөнөтү 180 күнгө чейин жылдырылат.
- Жеңилдетилген кредит берүү: Улуттук банк жана коммерциялык банктар менен биргеликте жеңилдетилген кредиттер каралат.
- Көзөмөл жана сапатты камсыздоо инфратүзүмү: "Манас" эл аралык аэропортунда лаборатория түзүлүп, башка региондордо лаборатория тармагын кеңейтүү пландалууда.
- Базарды кеңейтүү: ЕАЭБ алкагында эн тамгаларды өз ара таанууну тездетүү аркылуу экспорт мүмкүнчүлүктөрү кеңейтилет.
- Отчеттуулукту санариптештирүү: маалыматтар жана отчетторду санариптик алмашуу системасы аркылуу жөнөкөйлөтүү каралган.
Жарлыктын максаты — ата мекендик ювелирдик өндүрүштү колдоо, рынокту кеңейтүү жана сапаттуу продукцияны камсыздоо.
