Евробиримдик Кытайга олуттуу чектөөлөрдү киргизиши мүмкүн
Евробиримдик Кытай Европанын соода боюнча дооматтарына жооп бербесе жакын арада катуу чектөөлөрдү киргизиши мүмкүн экенин Франциянын президенти Эммануэль Макрон Echos басылмасына берген маегинде билдиргенин РБК медиахолдинги жазды.
“Мен аларга эгер алар жооп бербесе, анда биз – европалыктар, эң жакын арада катуу чараларды көрүүгө жана кызматташуудан чыгууга аргасыз болобуз… Мисалы, кытай продукциясына бажы төлөмдөрүн киргизүү”, – деди ал.
Буга улай Макрон анткени Пекин “европалык товарларды абдан аз импорттогондуктан” Кытайдын соода профицити туруксуз экенин айткан. Ал бул маселени Еврокомиссиянын башчысы Урсула фон дер Ляйен менен да талкуулаганын белгиледи.
Анын айтымында, Кытай Европанын салттуу станок куруу жана автоөндүрүүгө негизделген өнөр жай жана инновация рыногуна олуттуу сокку уруп жатат. Басылма белгилегендей, Кытай экспортунун өсүшүнүн жана КЭР өнөр жайынын атаандаштыкка жөндөмдүүлүгүнүн фонунда Евробиримдиктеги кырдаал критикалык абалга жеткен.
Ошондой эле Макрон АКШнын протекционисттик саясаты Европага кысымды күчөтүп, кытай экспортунун агымын европалык рынокторго бурду деп билдирди. Ал бул жагдайды европалык өнөр жай үчүн “өмүр же өлүм”маселеси деп мүнөздөдү.
“Биз адаптация рыногуна айланып калдык, бул эң жаман сценарий”, – деди Франция лидери. Өткөн жылы Франция менен Кытайдын ортосундагы соода дефицити 47 млрд евро болгон. КЭРдин маалыматы боюнча, 2025-жылдын биринчи жарымында Кытайдын ЕБ менен соодадагы профицити дээрлик 143 млрд долларга жетип, жарым жылдык үчүн рекорддук көрсөткүч болду.
Париж менен Пекиндин ортосундагы чыңалуу 2024-жылы ЕБ Кытай электромобилдерине бажы төлөмдөрүн киргизгенден кийин күчөгөн. Буга жооп катары Кытай француз коньяктарына минималдуу бааларды белгиледи, бул чочконун эти жана сүт өндүрүүчүлөрүндө ошондой эле чаралар колдонулушу мүмкүн деген тынчсыздануу жаратты.
