Президент УТРКны реконструкциялоону толук аяктоого каражат табуу тапшырмасын берди
Президент Садыр Жапаров кечээ капиталдык оңдоп-түзөөдөн өткөн Улуттук телерадиоберүү корпорациясынын имаратына барып, УТРКнын жаңыланган инфратүзүмү менен таанышып чыкты.
Эске салсак, УТРКнын стратегиялык маанисин жана анын туруктуу иштешин камсыз кылуу зарылдыгын эске алуу менен президент Садыр Жапаров 2023-жылы УТРКнын инфратүзүмүн капиталдык оңдоодон өткөрүү үчүн 307 млн сом бөлүү тапшырмасын берген.
Жүргүзүлгөн иштердин алкагында радио борбордун, редакциялык жана көркөм цех корпустары, административдик блоктун жана аппараттык-студиялык комплекстин фасады толук жаңыланган.
Ашкана кеңейтилип, он жылдан ашык пайдаланылбай келген эски кинозал заманбап көп функциялуу конференция залына айландырылган. Ошондой эле ардактуу конокторду кабыл алуу үчүн VIP-бөлмө жаңыртылган.
УТРКнын башкы директору Улан Сатиев учурда студияны модернизациялоо жана залдын акустикасын жакшыртуу зарылдыгын билдирди. Ошондой эле телерадиокорпорациянын кызматкерлеринин иш бөлмөлөрүндө оңдоо иштерин аягына чыгаруу кажет.
Президент Садыр Жапаров телеберүү жана радиону техникалык модернизациялоонун алкагында жабдууларды мурда каралгандай төрт жылда эмес, бир жыл ичинде сатып алуу маанилүү экенин баса белгилеп, УТРКны реконструкциялоону толук бүтүрүү үчүн зарыл каражаттарды табууну тапшырды. Ал каражаттарды узак мөөнөткө созуп өздөштүрүү техниканын эскиришине алып келип, модернизациянын натыйжалуулугун төмөндөтөрүн белгиледи.
