Тигүүчүлөр жана чакан бизнес үчүн салыктык жана камсыздандыруу жеңилдиктери каралууда
Кыргызстанда тигүү ишканаларынын бардык категориялары үчүн бирдиктүү шарттарды түзө турган мыйзам долбоору даярдалып жатат. Бул тууралуу Мамлекеттик салык кызматынын төрагасынын орун басары Кубанычбек Ысабеков Ала-Тоо LIVE программасына берген маегинде билдирди.
Анын айтымында, жаңы эрежелер тигүүчүлөрдүн бардык категориялары үчүн бирдей шарттарды түзөт. Камсыздандыруу төгүмдөрү орточо айлык акынынын 40%ынан 12% өлчөмүндө эсептелип, орточо 2 200 сомдун тегерегин түзмөкчү. Мындан тышкары, белгилүү бир мөөнөткө киреше салыгынан бошотуу да киргизилиши мүмкүн.
«Бул тигүүчүлөрдү оор мезгилде колдоого алып, бизнесин мыйзамдаштырууга түрткү берет», — деди төраганын орун басары Кубанычбек Ысабеков.
Эскерте кетсек, Кыргыз Республикасынын Президенти Садыр Жапаров тигүү тармагынын жана чакан жана орто ишкердиктин субъекттерин колдоого багытталган “Экономиканын айрым тармактарын колдоо боюнча чаралар жөнүндө” Жарлыкка кол койгон.
Ага ылайык, КРнын Министрлер Кабинетине пенсия системасынын натыйжалуулугун жогорулатуу жана сектордун социалдык-экономикалык туруктуулугун бекемдөө максатында тигүү тармагынын субъекттери үчүн киреше салыгынын ставкаларын жана камсыздандыруу төгүмдөрүнүн тарифтерин төмөндөтүүнү кароо сунушталган.
