Садыр Жапаров Араван районунун өнүгүү долбоорлору менен таанышты
Президент Садыр Жапаров 11-апрелде Ош облусуна болгон иш сапарынын алкагында Араван районуна барып, аймакты өнүктүрүү боюнча пландар менен таанышты. Бул тууралуу Президенттин басма сөз кызматынан кабарлашты.
Араван районунун акими Данияр Эркимбаев мамлекет башчысына акыркы жылдары аткарылган иштер жана келечектеги долбоорлор тууралуу маалымат берди.
Анын айтымында, 2021–2025-жылдары жол тармагына 954 млн сом бөлүнүп, 105 чакырым жол асфальтталган. Мындан тышкары, 50дөн ашык социалдык объект пайдаланууга берилип, өндүрүш көлөмү бир жарым эсеге өскөн. Жүздөгөн ишканалар ачылып, миңдеген жаңы жумуш орундар түзүлгөн.
Ошондой эле Керме-Тоо аймагында заманбап индустриалдык борбор куруу пландалып, анда он өнөр жай объектисин ишке киргизүү каралууда. Энергетика тармагында Араван-Сай дарыясына суу сактагыч куруу сунушу да көтөрүлүп, бул долбоор сугат суу тартыштыгын азайтып, айыл чарбасын жана туризмди өнүктүрүүгө шарт түзмөкчү.
Турак жай маселесин чечүү максатында 11 гектар жер бөлүү сунушталып, бул 18 миңден ашуун жаранды үй менен камсыздоого мүмкүндүк берет. Мындан тышкары, спорттук комплекс, ооруканага кошумча корпус жана жаңы административдик имарат куруу демилгелери айтылды.
Президент Садыр Жапаров аймактарды комплекстүү өнүктүрүү мамлекеттин негизги артыкчылыктарынын бири экенин белгилеп, сунушталган долбоорлор Араван районунун социалдык-экономикалык өсүшүнө жана калктын жашоо сапатын жакшыртууга өбөлгө түзөрүн билдирди.
