А.Жээналиев: "Климаттын өзгөрүшү суу экосистемасына олуттуу коркунуч жаратып жатат"
Климаттын өзгөрүшү суу экосистемаларына олуттуу коркунуч жаратып жатканын Эл аралык тоо күнүнө арналган конференцияда суу ресурстары, айыл чарба жана кайра иштетүү өнөр жайы министринин орун басары Алмаз Жээналиев билдирди.
Анын айтымында, бүгүнкү күндө өлкөдө болжол менен 500 миллиард куб метр сууну камтыган 10 миңге жакын мөңгү бар. Бул мөңгүлөр ичүүчү сууну топтоодо жана аны бөлүштүрүүдө негизги ролду ойнойт.
"Мөңгүлөрдүн эриши жана дарыя сууларынын топтолушу көп жылдык агымды түзүп, анын көлөмү болжол менен 50 миллиард куб метрди түзөт. Дал ушул агым калкты, экономиканы, айыл чарбасын, энергетиканы жана өнөр жайды суу менен камсыз кылган негизги булак болуп саналат. Бирок, чарбага деген суунун көлөмү чектелүү болуп, бул экономиканын бардык тармактарына таасирин тийгизип жатат”,-деди ал.
“Бүгүн биз климаттын тездик менен өзгөрүшү жана суу экосистемаларына болгон басымдын күчөшү сыяктуу олуттуу чакырыктарга туш болуп жатабыз. Маалыматтарга ылайык, суунун 95%ы айыл чарбасына, 3,5%ы ичүүчү сууга, 1,5%ы өнөр жайга багытталат. Калктын 60%дан ашыгы айыл жергесинде жашагандыктан, суу миллиондогон адамдар үчүн жашоонун жана туруктуулуктун негизи болуп саналат”,-деп кошумчалады ал.
