Байтик айылында көп функционалдуу агроөнөр жай комплексинин курулушу башталды
Бүгүн Аламүдүн районунун Байтик айылында көп функционалдуу агроөнөр жай комплексинин курулушуна капсула салуу аземи болуп, ага Суу ресурстары, айыл чарба жана кайра иштетүү өнөр жайы министри Бакыт Төрөбаев катышып, долбоордун өлкө үчүн маанилүүлүгүн белгиледи.
12 миллион долларлык инвестиция менен курула турган көп функционалдуу агроөнөр жай комплекси “Кыргыз Агрохолдинг” ААК жана Түштүк Кореянын “DOD Company” компаниясы менен түзүлгөн Инвестициялык келишимдин негизинде ишке ашырылат. Министр Төрөбаев кореялык компанияга терең ыраазычылык билдирип, муну Кыргызстан үчүн олуттуу өнөктөштүк деп баалады.
Долбоордун алкагында дүйнөлүк рынокто кеңири колдонулган минус 35°С тоңдуруу технологиясы киргизилет. Бул ыкма эттин табигый түзүлүшүн жана сапатын толук сактоого, кошумча затсыз узак мөөнөткө сактоого, салмагын жана түсүн өзгөртпөөгө мүмкүнчүлүк берет. Мындай стандарттар Түштүк Корея, Япония сыяктуу жогорку талаптагы рынокторго толук шайкеш келет.
Министр белгилегендей, комплекстин курулушу:
- фермерлер үчүн жаңы рынокторду ачат,
- өндүрүштү заманбап технологияларга өткөрөт,
- экспорттук потенциалды жогорулатат,
- инвесторлор үчүн ишенимдүү шарттарды түзөт,
- Кыргызстандын агрардык экономикасынын өсүшүн тездетет.
