Кыргызстан, Афганистан 157 млн долларлык 11 келишимге кол койду
Афганистандын борбор калаасында өткөн бизнес-форумдун жыйынтыгында эки өлкөнүн ишкерлери жалпы суммасы 157 млн долларды түзгөн 11 ниет келишимине кол коюшканын Экономика министрлиги билдирди.
Кабул шаарында өткөн иш-чарага бизнес чөйрөсүнүн жана мамлекеттик органдардын 100дөн ашуун өкүлү катышты. Кыргызстандын делегациясын экономика министри Бакыт Сыдыков жетектеди. "Кыргыз Экспорт" борборунун директору Урмат Такиров өнөктөштөргө республиканын экспорттук мүмкүнчүлүктөрүн тааныштырып, анын жыйынтыгында конкреттүү макулдашуулар түзүлдү.
Кол коюлган документтер негизги тармактар боюнча товарларды жана кызматтарды жеткирүүнү камтыйт. Экспорттук позициялардын тизмесине төмөнкүлөр кирет:
- телекоммуникациялык жабдуулар;
- курулуш материалдары (цемент);
- дары-дармектер жана бут кийим;
- айыл чарба продукциясы жана бал;
- логистикалык кызматтар.
Форум Афганистандын Соода жана инвестиция палатасы менен биргеликте уюштурулду. Келишимдерге кол коюудан тышкары, сапардын маанилүү окуясы катары Кабул шаарында Кыргызстандын Соода үйүнүн расмий ачылышы болду. Ошондой эле тараптар эки тараптуу жолугушууларды өткөрүп, өз ара сооданы мындан ары кеңейтүү жана биргелешкен долбоорлорду ишке ашыруу келечегин талкуулашты.
