Салык кызматы электрондук отчеттор боюнча окутуу өткөрдү

Мамлекеттик салык кызматы КРнын Жаратылыш ресурстары, экология жана техникалык көзөмөл министрлиги менен биргеликте жер казынасын пайдалануучулар үчүн лицензияны кармоо боюнча жыйымдарга байланыштуу эсептөөлөрдү жана отчетторду электрондук түрдө тапшыруу боюнча окутуу иш-чарасын өткөрдү.

Салык кызматынын маалыматына ылайык, окутуунун жүрүшүндө катышуучуларга лицензияны кармоо үчүн жыйымдарды эсептөө жана төлөө тартибиндеги акыркы жаңылыктар тааныштырылды. Айрыкча, Салык төлөөчүнүн жеке кабинети аркылуу отчетторду толтуруу жана тапшыруу боюнча практикалык көрсөтмөлөр берилди. Ошондой эле катышуучулар өздөрүн кызыктырган суроолорго жооп алышты.

Эске салсак, өзгөртүүлөр КРнын Министрлер Кабинетинин 2025-жылдын 25-ноябрындагы токтомуна ылайык киргизилген. Жаңы тартип боюнча, кен казууда жылдык план 90%дан төмөн аткарылса, жетишпеген көлөм үчүн жыйым 1-мартка чейин төлөнүп, 2-мартка чейин отчет тапшырылат. Ал эми издөө, чалгындоо жана долбоорлоо иштеринде эсеп 1-апрелге чейин берилет, төлөмдөр ай сайын жүргүзүлөт. Эгерде лицензия кыска мөөнөткө берилсе, жыйым реалдуу пайдалануу мөөнөтүнө жараша эсептелет жана зарыл учурда такталган эсептерди берүү мүмкүнчүлүгү каралган.

 Салык кызматы мындай чаралар отчеттуулукту жеңилдетип, ачык-айкындуулукту жогорулатууга багытталганын белгиледи.