Ун өндүрүүчүлөр ассоциациясы 2025-жылы Кыргызстанда эгиндин түшүмү 40%га азайганын билдирди
2025-жылы Кыргызстанда суунун аздыгынан дан өсүмдүктөрүнүн түшүмү 30–40%га азайганын ун өндүрүүчүлөр ассоциациясынын президенти Рустам Жунушов радиодо билдирди.
Анын айтымында, бул абал өлкөдө ун өндүрүшүнө таасир этпейт. Анткени жетишпеген дан Россия жана Казакстандан импорт аркылуу толукталат.
Жунушов Кыргызстанда өстүрүлгөн буудайдын көп бөлүгү тоюттук сортко таандык экенин, башкача айтканда, ун чыгарууга жараксыз экенин белгиледи. Бул климаттык шарттарга жана заманбап агротехнологиялардын жетишсиз колдонулушуна байланыштуу.
Дандын сапатын жакшыртуу үчүн Айыл чарба министрлиги менен биргеликте кластердик өнүктүрүү иштери жүргүзүлүүдө. Дан кластерине 2 млрд сомго жакын каражат бөлүнгөн. Анын бир бөлүгү кайра иштетүүчүлөргө 5 жылга 6% менен, калганы дан өстүргөн дыйкандарга берилген.
