31-декабрь КРнын Бажы кызматынын кызматкерлеринин кесиптик майрамы
Жыл сайын 31-декабрда Кыргыз Республикасынын Бажы кызматынын кызматкерлеринин кесиптик майрамы белгиленет. Бул майрам Кыргыз Республикасынын бажы кызматынын салттарынын уландысын өнүктүрүү жана камсыз кылуу максатында 2006-жылдын 15-февралындагы №98 Өкмөттүн токтому менен бекитилген.
Бажы кызматынын өкүлдөрүнүн кесиптик майрамы менен бүгүн Министрлер Кабинетинин Төрагасы Адылбек Касымалиевдин куттуктады. Өз сөзүндө төрага 2025-жылга карата бажы кызматына төлөмдөрдүн прогнозу 2024-жылга салыштырмалуу 23,2 пайызга жогору болгондугун баса белгиледи.
“2025-жылдын 29-декабрына карата бажы төлөмдөрү боюнча 156,6 млрд сом камсыздалып, болжол 103,2 % аткарылды же белгиленген көрсөткүчтөн 4,9 млрд сомго көп жыйналды. Бул жыйынтыктар бажы тутумунун туруктуулугун жана жүргүзүлүп жаткан реформалардын натыйжалуулугун тастыктайт”-деп билдирди Адылбек Касымалиев.
Билдирүүгө караганда, жылдын аягына чейин бажы кызматы 157 млрд сом чогултууну мерчемдеп жатат, бул бекитилген болжол 5,3 млрд сомго көп. Мындан сырткары бажы органдарынын кызматкерлерине болгон жүктөм олуттуу түрдө өсүп жаткандыгын А.Касымалиев билдирди.
“Акыркы жылдары иштетилген бажы декларацияларынын саны бир нече эсеге көбөйдү: 2021-жылы алардын саны болжол менен 113 миңди түзсө, 2024-жылдын жыйынтыгы боюнча 630 миңден ашты. Мындай өсүш штаттык кызматкерлердин санын көбөйтүү менен эмес, санариптештирүү, автоматташтыруу жана бизнес-процесстерди кайра карап чыгуу аркылуу камсыздалып, бажылык башкаруунун туруктуулугун жана жогорку сапатын сактоого мүмкүндүк берди” – деп билдирди Министрлер кабинетинин төрагасы.
