Ата мекендик ун өндүрүүчүлөр ун азыктарынын экспортун көбөйттү
Өнөр жай тармагынын жөнгө салынган жана фискалдаштырылган режимде иштөөгө өтүшү өндүрүштү кеңейтүү жана экспорттук потенциалды жогорулатуу үчүн жаңы мүмкүнчүлүктөрдү ачканын радионун түз эфиринде Ун өндүрүүчүлөр ассоциациясынын президенти Рустам Жунушов билдирди.
"Бүгүнкү күндө биз продукцияны 5–6 өлкөгө экспорттоп жатабыз, бирок бул ун эмес. Биз даяр продукцияны — макарон жана кондитердик азыктарды — Россияга, Беларуська, Өзбекстанга жана Казакстанга жөнөтөбүз. Ишканаларыбыздын бири кондитердик продукцияны АКШга чейин экспорттоп жатат", — деди Жунушов.
Ал бул кошумча наркы бар продукция экенин белгилеп, аны өндүрүүдө жумуш орундар түзүлүп, өлкө ичинде кошумча киреше калыптанып жатканын айтты.
Ассоциация башчысынын айтымында, Кыргызстандын ун экспорттоо мүмкүнчүлүгү коңшу өлкөлөрдүн катуу атаандаштыгынан улам чектелүү.
"Жаныбызда чийки затты өндүрүү жана кайра иштетүү көлөмү чоң болгон Казакстан турат, ошондой эле Өзбекстан да активдүү өнүгүп жатат — эгер 2015-жылы ал жакта 15–20 тегирмен болсо, азыр алардын саны болжол менен 200гө жетти. Алар Афганистандын рыногунда да иштеп жатышат", — деди ал.
Ошол эле учурда, Жунушовдун айтымында, ата мекендик өндүрүүчүлөр үчүн макарон, лапша жана кондитердик продукция сегментинде жакшы келечек бар.
"Бул багытта бизде реалдуу өсүү мүмкүнчүлүктөрү пайда болду. Азыркы тапта башка өлкөлөргө экспорттолгон продукциянын көлөмү болжол менен 150–170 миллионду түзөт", — деди ал.
