Мамлекеттик "Эко Оператор" ишканасы 2025-жылы утилдештирүү төлөмдөрүнөн 60 млн сом чогултту
2024-жылы өндүрүштүк жана керектөө калдыктары тууралуу мыйзам кабыл алынып, ага ылайык Тышкы экономикалык ишмердүүлүктүн товардык номенклатурасы (ТН ВЭД) коду боюнча 24 түрдөгү товарга утилдештирүү жыйымы (утильсбор) киргизилди. Бул товарлардын курамында 300 позициядан турган субтоварлар бар. Бул тууралуу АКИpress агенттигине берген маегинде Жаратылыш ресурстары, экология жана техникалык көзөмөл министрлигинин башчысы Медер Машиев билдирди.
ТН ВЭД (Тышкы экономикалык ишмердүүлүктүн товардык номенклатурасы) — Евразия экономикалык биримдигине (ЕАЭБ) мүчө өлкөлөрдүн (Россия, Беларусь, Казакстан, Армения, Кыргызстан) чек арасынан өткөн бардык товарларды классификациялоочу бирдиктүү код системасы.
"Бул аркылуу биз өндүрүүчүлөрдүн кеңейтилген жоопкерчилиги — РОБ принцибин киргиздик. Бүгүнкү күндө мамлекеттик ишкана катары “Эко Оператор” түзүлдү. Азыр экооператор утилдештирүү төлөмдөрүн чогултуу менен алектенип жатат", — деп түшүндүрдү министр.
Анын айтымында, 2025-жылдын жыйынтыгы боюнча "Эко Оператор" болжол менен 60 млн сом чогулткан. Бул каражаттар пластикти, таңгактоочу материалдарды жана башка товар түрлөрүн утилдештирүүгө багытталат.
Ошондой эле Медер Машиев учурда унаалар утилдештирүү жыйым системасына киргизиле электигин, бирок алардын айрым тетиктери камтылганын белгиледи. "Жогоруда айтканымдай, 24 товар позициясынын ичинен айрымдары автоунаанын тетиктери — айнек, дөңгөлөк, аккумулятор жана башка өзүнчө товарлар", — деди ал.
Министрдин айтымында, Жаратылыш ресурстары министрлиги өндүрүүчүлөрдүн кеңейтилген жоопкерчилиги системасынын жыйынтыктары баалангандан кийин гана автоунааларга утилдештирүү жыйымын киргизүү боюнча чечим кабыл алат.
