Кыргызстандын виртуалдык активдерин жүгүртүү көлөмү жогорулап жатат
АКШ тараптын демилгеси менен Президентке караштуу Виртуалдык активдер жана блокчейн-технологиялар тармагын өнүктүрүү боюнча Улуттук кеңештин катчылыгынын жетекчиси Фархат Иминов АКШнын Кыргызстандагы Атайын жана Ыйгарым укуктуу элчиси Лесли Вигери менен жолугушту.
Жолугушууда Фархат Иминов Улуттук кеңештин максаттары жана милдеттери, ошондой эле анын аткаруучу органы болуп саналган катчылыктын ишмердүүлүгү тууралуу айтып берди. Ал Кыргызстандагы виртуалдык активдер рыногу институционалдык өсүү баскычына өткөнүн белгилеп, 2025-жылдын биринчи жарым жылдыгынын жыйынтыгы боюнча жүгүртүү көлөмү 860 млрд сомго жакындаганын билдирди.
Фархат Иминовдун айтымында, санарип сомду киргизүү, реалдуу активдерди токенизациялоо долбоорлору, калктын санариптик каржылык сабаттуулугун жогорулатуу, мыйзамдык жана жөнгө салуучу нормаларды өркүндөтүү, ошондой эле виртуалдык активдер тармагындагы дүйнөлүк тенденцияларды эске алган инфраструктураны түзүү сыяктуу демилгелерди ишке ашыруу Кыргызстанды Web3 технологиялары боюнча аймактык хабга айлантууга өбөлгө түзөт.
Ошондой эле бул багытта KGST КМШ өлкөлөрүнүн арасында глобалдык Binance криптовалюта платформасына листингге киргизилген биринчи стейблкоин болгону белгиленди.
