Чек ара аркылуу товар жана транспорт каражаттарын мыйзамсыз алып кирүүнүн жоопкерчилиги күчөйт

Мамлекеттик салык кызматы Евразия экономикалык биримдигине мүчө мамлекеттердин мамлекеттик чек арасы аркылуу товарларды жана транспорт каражаттарын мыйзамсыз алып кирүү аракеттери үчүн жоопкерчилик чараларынын күчөтүлгөндүгүн маалымдады.

Билдирүүгө караганда, тиешелүү өзгөртүүлөр КРнын Укук бузуулар жөнүндө кодексине киргизилген жана 2025-жылдын 31-декабрындагы «Салык салуу, социалдык камсыздандыруу жана салыктык эмес кирешелер чөйрөсүндөгү КРнын айрым мыйзам актыларына өзгөртүүлөрдү киргизүү жөнүндө» КРнын Мыйзамына ылайык кабыл алынган.

Тагыраагы, аталган Мыйзамга ылайык, ЕАЭБге мүчө мамлекеттердин мамлекеттик чек арасы аркылуу товарларды жана транспорт каражаттарын мыйзамсыз өткөрүү аракеттери үчүн жоопкерчилик чаралары күчөтүлдү.

Айып пулдун өлчөмү жеке жактар үчүн — 10 000 сомдон 20 000 сомго, юридикалык жактар үчүн — 28 000 сомдон 65 000 сомго чейин көбөйтүлдү.

Бул укук бузууларды жыл ичинде кайталагандар үчүн айып пулдардын өлчөмү  жеке жактар үчүн 20 000 сомдон 40 000 сомго чейин, юридикалык жактар үчүн 65 000 сомдон 100 000 сомго чейин жогорулады. Ошондой эле товарларды конфискациялоо каралган.

Белгилей кетсек, кыргыз-казак мамлекеттик чек арасында жайгашкан «Ак-Жол» товарларды эсепке алуу пункту аркылуу контролдук жол-жоболордон өтүүдөн качуу максатында жеңил транспорт каражаттары менен тиешелүү коштомо документтери жок товарларды КРнын аймагына ташып кирүү учурлары көбөйгөн. Аталган тилкеде косметикалык продукциялар, биологиялык активдүү кошулмалар, дары-дармек каражаттар, тамеки буюмдар, уюлдук телефондор, вейптер жана электрондук тамекилер сыяктуу эсепке алынбаган товарларды алып кирүү аракеттери катталууда.

Ушуга жараша, Салык кызматы салык төлөөчүлөрдү КРнын мыйзамдарынын талаптарын так сактоого чакырууда.