"Жеңил өнөр жай" ассоциациясы Бангладеш жарандарынын жумуш визаларын узартууну суранды
"Жеңил өнөр жай" ассоциациясы тигүү өнөр жайына эмгек мигранттарын тартуу максатында Кыргызстанда иштеп жаткан Бангладеш жарандарынын жумуш визаларын узартууну өтүнгөнүн ассоциациянын өкүлү "Ала-Тоо" депутаттык комитетинин жыйынында билдирди.
Анын айтымында, Бангладеш жарандары өлкөгө келишимдердин негизинде тартылып, расмий түрдө иштеп, салык төлөп жатышат.
"Ушуга байланыштуу биз компаниялар аркылуу расмий катталган эмгек мигранттарынын жумуш визаларын узартуу мүмкүнчүлүгүн карап чыгууну сунуштайбыз. Алар тартылган учурда келишимдерде эмгек шарттары жана иштөө мөөнөттөрү так көрсөтүлөт", — деди "Жеңил өнөр жай" ассоциациясынын директору Азамат Керимбек уулу.
Ассоциациянын өкүлү визалар узартылбаса, өндүрүш процесстери үзгүлтүккө учурашы мүмкүн экенин баса белгиледи.
Ал эми айрым иш берүүчүлөр келишим шарттарын сактабай, чет өлкөлүк жумушчуларга турак жай бербеген учурлар бар экенин белгиледи. Натыйжада кээ бир чет элдик жарандар жашай турган жери жок калууда. Ошол эле учурда бардык талаптарды так аткарып, салык төлөп иштеген компаниялар да бар экенин айтты. Анын айтымында, бардык шарттар сакталган учурда эмгек акынын өздүк наркы төмөн болот.
"Алардын мессенжерлерде өз тайпалары бар, ошол жакта айлык акы 500–600 доллар экенин айтып жатышат. Азыр абал өтө оор — чет өлкөлүк жумушчулар цехтен цехке өтүп жүргөн жергиликтүү тигүүчүлөрдөн да жаман абалга келип калды. Бирок бул маселеге ыкчам чара көрүп жаткан укук коргоо органдарына ыраазычылык билдиребиз", — деген ал бул тармакты катуу жөнгө салуу зарыл экенин кошумчалады.
