Кыргызстан менен ЭВФ кызматташтыгы: экономикалык реформалар талкууланды
Министрлер Кабинетинин Төрагасынын орун басары – Суу ресурстары, айыл чарба жана кайра иштетүү өнөр жайы министри Бакыт Төрөбаев Эл аралык валюта фондунун (ЭВФ) Кыргызстандагы туруктуу өкүлү Фарид Талышлы менен жолугушту. Бул тууралуу Өкмөттүн басма сөз кызматынан билдиришти.
Жолугушуунун жүрүшүндө Кыргызстан менен ЭВФтин ортосундагы кызматташтыктын учурдагы абалы жана келечеги талкууланды. Анда ЭВФтин өлкөнүн түзүмдүк реформаларын алдыга жылдырууда жана экономиканы өнүктүрүүдө көрсөтүп келе жаткан колдоосу өзгөчө белгиленди.
Акыркы жылдары ишке ашырылган масштабдуу түзүмдүк реформалар эл аралык рейтингдик агенттиктер тарабынан оң бааланып, алар ишкердик активдүүлүктү турукташтырууга, стратегиялык тармактарды колдоого, инфраструктураны модернизациялоого жана инвестициялык климатты жакшыртууга багытталган.
Белгилүү болгондой, 30 жылдан ашуун убакыттан бери ЭВФ Кыргызстанда 12 маанилүү программаны ишке ашырып, экономиканы колдоого, жакырчылыкты кыскартууга жана туруктуу, инклюзивдик өсүштү камсыздоого салым кошуп келет.
Ошондой эле акыркы үч жылда өлкө экономикасынын орточо өсүү темпи 9,0%ды түзгөнү белгиленип, бул көрсөткүч экономиканы модернизациялоого, инвестициялык климатты жакшыртууга жана мамлекеттик башкаруудагы реформаларга багытталган натыйжалуу мамлекеттик чаралардын жыйынтыгы экени айтылды.
