Кыргызстан калкынын колунда 300 млрд сомго чейин накталай акча бар
Кыргызстанда калктын колунда 200–300 миллиард сом өлчөмүндө накталай акча жүгүртүлүп жатканын Кыргыз фондулук биржасында өткөн пресс-конференцияда Финансылык рынокту жөнгө салуу жана көзөмөлдөө кызматынын төрагасы Марат Пирназаров билдирди.
Анын айтымында, бул ири сумма болуп, инфляциялык процесстердин шартында кооптонууну жараткан тенденция болуп эсептелет.
"Биздин негизги максат — калкка бул каражаттарды “жаздыктын астында” сактабастан, инвестицияларга, реалдуу секторлорго багыттоо зарылдыгын түшүндүрүү. Эгерде биз аймактык хаб болууну кааласак, анда инвесторлор үчүн ылайыктуу шарттарды түзүшүбүз керек. Маселен, Freedom тобу Кыргызстанда өз платформасын өнүктүрүү жана алыстан идентификациялоого уруксат берүү сунушун киргизди. Анткени азыркы заманда эч ким брокердик эсеп ачуу үчүн биздин өлкөгө атайын учуп келбейт", — деди Пирназаров.
Ошондой эле ал бир катар маанилүү долбоорлор ишке ашырылып жатканын белгиледи. Алардын катарында улуттук депозитарийди түзүү долбоору бар. Бул демилге каржы рыногундагы айкындуулукту жогорулатып, тобокелдиктерди азайтууга багытталган.
Мындан тышкары, Пирназаров виртуалдык активдер тармагын өнүктүрүү үчүн тиешелүү мыйзамдарга өзгөртүүлөр киргизилип жатканын маалымдады.
