Президенттин тапшырмасына ылайык тигүү тармагын өнүктүрүү чаралары иштелүүдө
Президент Садыр Жапаровдун "Ынтымак Ордо" резиденциясында тигүү тармагынын өкүлдөрү менен өткөн кеңейтилген жолугушууда берилген тапшырмаларды аткаруу максатында Экономика жана коммерция министрлиги тиешелүү мамлекеттик органдар менен биргеликте тармакты өнүктүрүүгө багытталган сунуштарды иштеп чыгууда.
Ведомствонун маалыматына ылайык, жолугушууну Президент Садыр Жапаров өзү өткөрүп, ага ишкерлер, жүндү кайра иштетүүчүлөр, Wildberries маркетплейсинин, логистикалык компаниялардын өкүлдөрү жана мамлекеттик органдардын жетекчилери катышты.
Мамлекет башчысы тигүү тармагы калкты иш менен камсыз кылууда, экспортту өнүктүрүүдө жана ишкердикти колдоодо маанилүү роль ойной турганын белгиледи.
Жыйындын жүрүшүндө тармактагы актуалдуу маселелер талкууланып, жыйынтыгында тиешелүү министрликтерге, мамлекеттик органдарга жана финансылык институттарга конкреттүү тапшырмалар берилди. Алардын аткарылышы Президенттин жеке көзөмөлүндө.
Ошол эле күнү Экономика жана коммерция министрлиги жеңил өнөр жай тармагынын өкүлдөрү менен жумушчу жыйын өткөрүп, тигүү тармагындагы көйгөйлөрдү тармак өкүлдөрү менен биргеликте чечүү боюнча иштерди баштады.
Министрлик тиешелүү ведомстволор менен бирге тигүү тармагынан түшкөн сунуштарды карап чыгып, тармакты туруктуу өнүктүрүүгө багытталган чараларды ишке ашырууда.
