ММКФнын 2026-жылга бюджети 10,7 млрд сом деп бекитилди
Президент Садыр Жапаров "Саламаттык сактоо министрлигине караштуу Милдеттүү медициналык камсыздандыруу фондуна (ММКФ) 2026-жылга жана 2027–2028-жылдарга пландалган мезгилге карата бюджет жөнүндө" мыйзамга кол койду.
ММКФнын 2026-жылга карата бюджети кирешелер боюнча 10 млрд 737 млн 596 миң сом өлчөмүндө, чыгашалар боюнча да ушундай эле көлөмдө бекитилди. Ошондой эле Фонддун 2027–2028-жылдарга пландалган мезгилдеги бюджети да жактырылды.
Мыйзам менен республикалык бюджеттен ММКФга өткөрүлүп берилүүчү каражаттардын көлөмү 2026, 2027 жана 2028-жылдар үчүн жыл сайын 2 057 870,4 миң сом өлчөмүндө белгиленди. Республикалык бюджеттен бөлүнүп, пайдаланылбай калган каражаттар алар берилген бюджеттин кирешесине кайтарылып алынат.
Ошондой эле Социалдык фонддун бюджетинен ММКФнын бюджетине которула турган каражаттардын көлөмү аныкталды. Тактап айтканда, 2026-жылы — 6 503 418,2 миң сом, 2027-жылы — 6 911 898,5 миң сом, 2028-жылы — 7 472 258,3 миң сом. Социалдык фондго жыл ичинде камсыздандыруу төгүмдөрүнүн өз убагында жана толук которулушун камсыз кылуу тапшырылды.
ММКФнын 2026-жылга карата бюджетинин айланма кассалык накталай каражаттарынын көлөмү 541 951,5 миң сом өлчөмүндө белгиленди. Бул каражаттар табигый кырсыктар, техногендик катастрофалар, террордук актылар жана башка өзгөчө кырдаалдар сыяктуу сындуу жагдайлар жаралган учурда Фонддун чыгымдык милдеттенмелерин аткарууга багытталышы мүмкүн.
