Кыргызстанда 2025-жылы жумушсуздардын саны 25%га кыскарды

Кыргызстанда 2025-жылдын жыйынтыгы боюнча жумушсуз жарандардын саны 22%га кыскарганын Эмгек министрлигинин коллегиясында министрдин биринчи орун басары Камчыбек Досматов билдирди.

Анын айтымында, расмий жумушсуздуктун деңгээли 1,4%ды түздү. Бул көрсөткүч мурунку жылдарга салыштырмалуу төмөн. Тактап айтканда, 2021-жылы — 2,9%, 2022-жылы — 2,8%, 2023-жылы — 2,9%, 2024-жылы — 1,8% болгон.

Иш менен камсыз кылуу кызматтарында каттоодо 56,5 миң жумушсуз жаран турган, бул 2024-жылдын ушул эле мезгилине салыштырмалуу 20%га аз (70,6 миң адам). Ал эми расмий жумушсуз макамына ээ болгондордун саны 38,1 миң адамды түзүп, бул 2024-жылдагы деңгээлден 22%га төмөн.

Ведомствонун маалыматына ылайык, отчеттук мезгил ичинде 17,5 миң адам жумушка орноштурулуп, дагы 19,8 миң жаран ар кандай иш менен камсыз кылуу программаларына катышкан.

Коллегияда өзгөчө көңүл "Жаштар үчүн стажировка" долбооруна бурулду. Бул долбоор жаш адистердин кесиптик көндүмдөрүн жогорулатууга жана жумушка орношууга көмөк көрсөтүүгө багытталган. Долбоордун алкагында 2024–2025-жылдары стажировкадан өткөндөргө ай сайын эмгек акы төлөнгөн. Программа 30 пилоттук район жана шаарда ишке ашырылып, 3 миңге жакын жашты камтыган.