Былтыр Солтон-Сарынын Бучук тилкесинен 876,3 килограмм алтын өндүрүлгөн
Нарын райондук администрациясы берген маалыматка ылайык 2025-жылы Солтон-Сары кенинин Бучук тилкесинде 876,3 килограмм алтын өндүрүлгөн.
Кендеги алтын ылгоочу фабрика 2024-жылдын октябрь айында сыноо режиминде иштей баштаган. Ишкана жылына 600 миң тонна кен иштетүүгө жана болжол менен 1,8 тонна алтын өндүрүүгө эсептелген. Долбоорго салынган инвестициянын көлөмү 12 млрд сом деп бааланууда.
Солтон-Сары алтын кени Бишкек шаарынан 355 чакырым алыстыкта, Нарын облусундагы Капка-Таш тоо кыркасынын түндүк капталында жайгашкан. Кен үч тилкеден турат: Бучук, Ак-Таш жана Алтын-Төр. Акыркы тилкени "Кыргызалтын" ААКсы иштетет.
Кендин жалпы болжолдуу алтын запасы 20 тоннага жакын деп бааланат.
Zhong Ji Mining компаниясы Бучук тилкесинде иш жүргүзүү укугун 2009-жылы сатып алган. 2011-жылдан тартып жергиликтүү тургундар кенди иштетүүгө каршы чыгып келишкен. Алардын пикиринде, өндүрүш айлана-чөйрөгө зыян келтирип, мөңгүлөрдүн эришине алып келиши мүмкүн. Ушул себептен улам компания 2019-жылы курулуш иштерин токтоткон. Кийинчерээк иштер кайра жандантылган.
