Кыргызстанда 4 жылда 173 млрд 596 млн сом инвестиция өздөштүрүлдү
2021–2025-жылдар аралыгында Кыргызстанда 173 млрд 596,1 млн сом өлчөмүндө инвестиция өздөштүрүлгөнүн Кыргызстандын Финансы министрлиги маалымдады. Министрлик транспорт, энергетика, суу менен камсыздоо, саламаттык сактоо жана агрардык сектордогу стратегиялык долбоорлор боюнча маалымат берди.
Транспорт — 47 771,4 млн сом
Шаардык транспорт жаңыланып, 124 кысылган жаратылыш газы (КПГ) менен жүргөн автобус жана 120 электробус алынды, 85 кубаттоочу түзмөк орнотулду.
Негизги жол долбоорлору аяктады: Түндүк–Түштүк альтернативалуу унаа жолу, Бишкек–Ош унаа жолунун айрым тилкелери, ошондой эле Түп–Кеген эл аралык багыты ачылды.
Энергетика — 38 402,3 млн сом
500 кВ "Датка" электр берүү линиясы (329,63 км) курулуп, 897 тирөөч, 281 трансформатор жана 35 кВ кубаттуулуктагы 10 трансформатор орнотулду.
500,1 миң "акылдуу" эсептегич ишке киргизилип, ГЭСтердеги 2 гидроагрегат алмаштырылды (кубаттуулук 120 МВтка көбөйдү).
Ысык-Көл, Нарын жана Ош электр тармактары үчүн 719,5 км электр линиясы тартылып, 117 352 эсептөөчү прибор орнотулду.
Суу менен камсыздоо — 23 165,7 млн сом
796 айыл таза ичүүчү суу менен камсыз болду. Анын ичинен 76 айылда иштер толугу менен аяктап, 174 миң адам таза сууга жеткиликтүү болду. Учурда иштер 258 айылда уланууда.
Каракол шаарында саркынды сууларды тазалоочу жайдын курулушу аяктоо алдында турат.
Саламаттык сактоо — 6 597,1 млн сом
Улуттук перинаталдык борбор ачылып, 10 ПЦР-лаборатория жабдылды. Аймактык ооруканалар үчүн тез жардам унаалары жана медициналык жабдуулар сатып алынды.
Айыл чарба жана ирригация — 16 878,3 млн сом
17,7 миң уй жасалма уруктандырылып, болжол менен 10 миң баш төл алынды. 11 000 баш мал сатылып алынып, 7 378 фермерге (934,6 млн сом) колдоо көрсөтүлдү.
12 162 гектар сугат жер модернизацияланып, 17,981 км магистралдык жана 29,717 км чарба ичиндеги каналдар курулду. Жаңы гидропосттор жана жабдуулар орнотулду.
