Apple компаниясы ачык түстөгү арзан MacBookтарды чыгарат
Apple компаниясы iPhone’дун процессору менен жабдылган жана ачык түстөгү корпуска ээ болгон жеткиликтүү баадагы жаңы MacBook чыгарууга даярданып жатканын Bloomberg агенттиги маалымдады.
Жаңылыктын негизги өзгөчөлүгү — кадимки Apple Silicon M-сериясындагы чиптердин ордуна iPhone 16 Pro смартфонунда колдонулган A18 Pro процессорунун пайдаланылышы. Өндүрүмдүүлүк жагынан бул чечим учурдагы MacBook Air моделдеринен төмөн болушу мүмкүн, бирок A18 Pro чипи M1 деңгээлине жакын көрсөткүчтөрдү берет.
Ноутбуктун экраны 13 дюймдан кичине болот деп күтүлүүдө, болжол менен 12,9 дюйм. Корпусу металл бойдон калат. Бааны төмөндөтүү үчүн пластик колдонуу идеясынан компания баш тарткан. Анын ордуна MacBook Pro жана MacBook Air моделдерине салыштырмалуу алюминий корпусту тезирээк жана үнөмдүү ыкма менен өндүрүү технологиясы иштелип чыккан.
MacBookтун баштапкы баасы 699 доллардын түзүшү мүмкүн. Бул базалык MacBook Air моделинин 999 долларлык баасынан кыйла төмөн.
Эгер бул маалыматтар тастыкталса, жаңы MacBook акыркы жылдардагы эң жеткиликтүү баадагы Apple ноутбугу болуп, негизинен студенттерге жана баа менен өндүрүмдүүлүктүн тең салмактуулугун издеген колдонуучуларга багытталат.
