Чүй облусунда 22,83 гектар жер ЕАЭБ пункттарындагы товар алмашуу үчүн даярдалды
Чүй облусу боюнча президенттин ыйгарым укуктуу өкүлүнүн биринчи орун басары Санжар Жантаев аймактын социалдык-экономикалык өнүгүүсү боюнча коллегиянын жыйынында 2025-жылдын 18-декабрындагы № 14-13633 "ЕАЭБге мүчө мамлекеттерден ташылып келинген товарларды эсепке алуу пункттарында мамлекеттик органдардын жана маалыматтык системалардын өз ара аракеттенүүсү жөнүндө" МинКаб төрагасынын орун басарынын тескемесинин аткарылышы тууралуу маалымат берди.
Анын айтымында, Панфилов районундагы Чалдыбар өткөрмө пунктунун жанынан жалпы аянты 3 гектар жер тилкеси бөлүнгөн. Анын ичинен 6 объект Мамлекеттик мүлктү башкаруу фондуна өткөрүп берилген.
"2025-жылдын 20-ноябрында Панфилов райондук мамлекеттик администрациясы жогоруда көрсөтүлгөн жер тилкелерин кабыл алуу боюнча Мамлекеттик салык кызматына кат жолдогон", — деди Жантаев.
Аламүдүн районунда Ак-Жол өткөрмө пунктунун жанынан аянты 5,2 гектар жер тилкеси даярдалган. Жерлерди калыптандыруу иштери Жер ресурстары, кадастр, геодезия жана картография боюнча мамлекеттик агенттиктин филиалында аяктап, документтер тактоо жана текшерүү үчүн райондук администрацияга өткөрүлүп берилген.
Ысык-Ата районунда Кочкорбаев айыл аймагындагы 5 гектар жер тилкеси кампаларды куруу үчүн убактылуу пайдаланууга Мамлекеттик салык кызматына берилген. Ал эми Ак-Кудук айыл аймагындагы дагы 5 гектар жер тилкеси Жер ресурстары боюнча мамлекеттик агенттиктин кароосуна жөнөтүлгөн.
Сокулук районунда МинКаб № 1180-т тескемесине ылайык, Төмөнкү-Чүй — автожол өткөрмө пунктунун ишин жандандыруу жана Фрунзе айылынан аталган өткөрмө пунктка чейин жол куруу иштери жүргүзүлүүдө. Жер тилкелерин алмашуу жана каттоодон өтпөгөн жерлерди эсепке алуу үчүн ведомстволор аралык комиссия түзүлгөн. Мамлекеттик агенттиктин филиалы жана Төмөнкү-Чүй айыл аймагы менен биргеликте жеке менчиктеги жерлердин аянты такталган.
"Алмашууга берилүүчү жерлердин жалпы аянты 22,83 гектарды, ал эми каттоодон өтпөгөн айыл чарба жерлери 10,23 гектарды түзөт. Жерлер менчик ээлеринин каалоосу боюнча бөлүштүрүлөт, ээси жок тилкелер айыл аймагынын балансына өткөрүлөт", — деп билдирди биринчи орун басар.
