Дыйканчылыктын "чемпиондоруна" 25 миң сомдук сертификаттар берилди
Бишкекте Суу ресурстары, айыл чарба жана кайра иштетүү өнөр жайы министрлиги тарабынан уюштурулган “Агро Диалог – 2026” иш-чарасы өтүп жатат. Иш-чара айыл чарба тармагындагы инновацияларды жайылтуу, дыйкандардын тажрыйба алмашуусун күчөтүү жана өндүрүштүн натыйжалуулугун жогорулатуу максатын көздөйт.
Иш-чаранын алкагында 2025-жылдын жыйынтыгы менен “чемпион” аталган алдыңкы дыйкан-фермерлер салтанаттуу түрдө кызыл килемден өтүшүп, коомчулукка тааныштырылды.
Тармактагы мыктыларга медалдарды жана 25 миң сомдук сертификаттарды министр Бакыт Төрөбаев ыйгарды.
Бул сыйлыктар айыл чарба өндүрүшүндө жогорку көрсөткүчтөргө жетишкен эмгекчил дыйкандардын ийгилигин даңазалоо менен бирге, башкаларга дем берүүчү үлгү болуп саналат.
Андан соң чемпион дыйкандар өздөрүнүн тажрыйбасы менен бөлүштү. Талас облусунун Манас районунан келген Талас Муратов өткөн жылы гектарынан 25 тонна калемпир алып, өсүмдүк өстүрүү боюнча чемпион аталды.
Чүй облусунун Жайыл районунун дыйканы Аскар Токушев помидордон гектарына 1200 центнер түшүм алып, рекорддук көрсөткүч жаратты. Москва районунан келген Шамиль Магаза гектарынан 800 центнер сабиз өндүрүп, жеңүүчүлөр катарына кирсе, Баткен облусунун Лейлек районунун дыйканы Сеит Полотов пияздан гектарына 600 центнер түшүм алып, жогорку натыйжа көрсөттү.
Белгилей кетсек, “Агро Диалог – 2026” иш-чарасы 18–20-февраль күндөрү агрардык университетте өтүп, 21-февралда жыйынтыктоочу бөлүгү Т. Сатылганов атындагы Кыргыз улуттук филармониясында өтөт. Ага Министрлер Кабинетинин төрагасы Адылбек Касымалиев катышат.
