Япония ашкабагынын уругун, экинчи түшүм катары - түрп өстүргөн фермерлер эмне дейт?
Суу, айыл чарба жана кайра иштетүү министрлиги уюштурган “Агродиалог-2026” форумунун мастер-классына катышып жаткан фермер, Сокулук районунун Гавриловка айылынын тургуну Айдин Шабданов, Баткендеги Какыр-Келечек кооперативинин жетекчиси Айдулло Саидов өздөрүнүн тажрыйбасы менен бөлүштү.
“Бизге япониялык компания келип ашкабактын уругун сээп берет. Биз аны өстүрүп, данектерин кайра Японияга экспорттойбуз. Былтыр 1 гектар жерге эгилген ашкабактан 250 килограмм урук алдык. Анын бир килограммы 40 доллардан жогору турат. Акыркы жылдары өзүңүздөр байкагандай Кыргызстанда жер топурагына анализ кылуу жакшы жолго коюлуп жатат. Фермер катары мен дагы жерге жер семирткич берүүнүн алдында топуракты анализ кылып, кандай макро, микроэлементтер жетишперин билип алууну сунуштайм”,-дейт ал.
Кадамжай районунун И.Масалиев айыл өкмөтүнө караштуу Какыр-Келечек кооперативинин жетекчиси Айдулло Саидов былтыр бир эле жерден экинчи түшүмду жакшы алганын ортого салды.
“Биз Министлер Кабинетинин №309 токтомунун негизинде 31 гектар жерди көп жылдык ижарага алганбыз. Аны натыйжалуу пайдалануу максатында буудай жыйналып алынган соң экинчи түшүм катары түрп эккенбиз. Былтыр бул форумга көрүүчү болуп келсем, быйыл чемпион болуп келдим. “Агродиалогдун” дыйкандарга пайдасы бул жерде тажрыйба алмашып, билим алып, жеңилдетилген насыяларды алууга шарт түзүлөт”,-экен деди элеттик фермер.
