Кытай – Кыргызстан – Өзбекстан – Тажикстан багыты боюнча алгачкы контейнердик поезд каттамы ишке кирди
Поезд Кытайдын "Ланьчжоу" станциясынан чыгып, Душанбе-2 станциясын көздөй жөнөгөнүн Podrobno.uz жазды.
Курам 3,5 миң чакырымдан ашык аралыкты 18–20 күндө басып өтөт. Бул жаңы каттам аймактык транспорттук коридордун маанилүү бөлүгү болуп калды.
Долбоор UTK International Logistics Co. Ltd биргелешкен ишканасы тарабынан ишке ашырылды. Компания Кытайда "Узтемирйулконтейнер" акционердик коому менен бирге түзүлгөн. Өзбекстандык тарап негизги тең уюштуруучу болуп, жүктү ташууну уюштурган.
Поезддин курамына эл керектөөчү товарлар жана курулуш техникасы жүктөлгөн сегиз даана 40 футтук контейнер кирген.
Бул маршруттун ишке кириши 2025-жылы Душанбе шаарында Кыргызстан, Өзбекстан жана Тажикстандын лидерлеринин жолугушуусунда жетишилген макулдашуулардын практикалык уландысы болду.
