Япония Кыргызстандагы фермерлерди колдоо долбоорун 4,5 млн долларга каржылайт
Суу, айыл чарба, кайра иштетүү министрлиги менен БУУнун Дүйнөлүк азык-түлүк программасы(ДАП) жаңы долбоорду ишке киргизүү боюнча кол коюу аземин өткөрүшкөнүн министрликтин басма сөз кызматы билдирди.
Иш-чарага министрдин орун басары Мирбек Дүйшеев, Япониянын Кыргызстандагы элчиси Хирано Рюити, ошондой эле ДАПтын Кыргызстандагы өкүлү жана директору Кожиро Накай катышты.
Белгиленгендей, айыл чарба өлкөдөгү айылдык жамааттар үчүн негизги киреше булагы бойдон калууда. Бирок бул тармак климаттын өзгөрүшү, суу тартыштыгы жана заманбап агротехнологиялардын жетишсиз колдонулушу сыяктуу көйгөйлөрдөн улам барган сайын кыйынчылыктарга туш болууда.
Мирбек Дүйшеевдин айтымында, жаңы демилге айыл чарбасынын өндүрүмдүүлүгүн жогорулатуу жана фермердик кооперативдерди бекемдөө боюнча улуттук артыкчылыктарды толуктайт.
Япония тарабынан бөлүнгөн 4,5 миллион доллар көлөмүндөгү каржылоо Баткен, Жалал-Абад жана Ош облустарындагы 17 миң майда фермерге колдоо көрсөтүүгө мүмкүндүк берет.
Долбоор климаттык өзгөрүүлөргө эң алсыз аймактарда азык-түлүк коопсуздугун, туура тамактанууну жана жашоо каражаттарын жакшыртууга багытталган. Өзгөчө көңүл майда фермерлердин, айрыкча аялдардын мүмкүнчүлүктөрүн кеңейтүүгө бурулат. Мындан тышкары, суу жана жер ресурстарын туруктуу башкаруу жакшыртылып, тоолуу аймактардагы базар байланыштары бекемделет.
Долбоор JICAнын техникалык колдоосу менен ишке ашырылып, министрликтин мөмө-жемиш жана жашылча продукциясынын кошумча нарк чынжырларын өнүктүрүү боюнча башкы планына салым кошот.
Демилгенин алкагында фермерлерге төмөнкүлөр камсыздалат:
- сапаттуу көчөттөр;
- тамчылатып сугаруу системасы бар климатка туруктуу күнөсканалар;
- суу сактоочу резервуарлар;
- органикалык компост өндүрүүчү аянтчалар;
- түшүм жыйнагандан кийинки жоготууларды азайтуу үчүн чакан кампалар.
Ошондой эле төмөнкү багыттар боюнча окутуу программалары каралган:
- климаттык шарттарды эске алуу менен дыйканчылык жүргүзүү;
- түшүм жыйнагандан кийинки процесстерди башкаруу;
- кооперативдерди жана каржыны башкаруу.
