Кыргызстан ТМУнун экономикалык кызматташтыгын бекемдөөгө демилге көтөрдү
Бүгүн Казакстан Республикасынын Түркестан шаарында Түрк мамлекеттер уюму (ТМУ) экономика жана соода министрлеринин 14-жыйыны болуп өттү. Жыйынга Кыргыз Республикасынын экономика жана коммерция министринин орун басары Султан Ахматов катышты. Бул тууралуу Экономика жана коммерция министрлигинен билдиришти.
Султан Ахматов өз сөзүндө мурда жетишилген макулдашууларды практикалык жактан ишке ашыруунун маанилүүлүгүн, ошондой эле экономикалык кызматташуунун артыкчылыктуу багыттары боюнча биргелешкен ишти активдештирүүнүн зарылдыгын белгиледи.
Жыйындын жыйынтыгында ТМУга мүчө мамлекеттердин экономика жана соода министрлеринин 14-жыйынынын Коммюникеси кабыл алынды. Мындан тышкары, экономика, соода, инвестиция жана финансы тармактарында кызматташууну өнүктүрүүгө багытталган Жол картасы кабыл алынды.
Бул документ кыргыз тараптын демилгеси менен иштелип, өз ара сооданы тереңдетүү, инвестициялык кызматташтыкты күчөтүү жана финансылык алакаларды чыңдоого багытталган.
