Айыл чарба министрлиги мигранттарга 200 миң гектар кароосуз жерлерди берүүгө даяр
МинКаб эмгек мигранттарына иштетүү үчүн 200 миң гектар кароосуз жаткан жерлерди берүүгө даяр экенин Жогорку Кеңештин агрардык саясат, суу ресурстары, жер казынасын пайдалануу, экология жана айлана-чөйрөнү коргоо боюнча комитетинин жыйынында суу ресурстары, айыл чарба жана кайра иштетүү өнөр жайы министринин биринчи орун басары Жаныбек Керималиев билдирди.
Анын айтымында, жүргүзүлгөн ревизиянын жыйынтыгында өлкөдө 614 миң гектар кароосуз жер бар экени аныкталган.
"Анын ичинен учурда 200 миң гектар жерди айыл чарба муктаждыктары үчүн бөлүп берүүгө даярбыз. Бул демилге жаңы жумуш орундарын түзүүгө жана эмгек мигранттарын колдоого багытталган. Жер иштетүүнү каалагандарга тилкелерди суу жана электр энергиясы менен камсыздоого көмөктөшөбүз. Ал эми мигранттар өз каражатына жерлерин тосмолоп, тамчылатып же жамгырлатып сугаруу үчүн жабдууларды сатып алып, айыл чарба иштерин жүргүзүшөт. Учурда каалоочулардан арыздар түшө баштады", — деди Жаныбек Керималиев.
